Framtidas design startar i materialet

Dette veit vi: Skal vi redusere utsleppa og ressursbruken, må vi tenkje annleis om materiala vi bruker. 

Dei neste åra kan mykje av den viktigaste innovasjonen dermed ligge i sjølve materiala framfor produkta: kva vi bruker, korleis dei blir framstilte, kor mykje vi bruker av dei, og kva som skjer med dei etterpå. 

Nye krav til berekraft, skjerpa internasjonal konkurranse, usikre verdikjeder og knappare tilgang på ressursar gjer at stadig fleire verksemder må tenkje annleis om korleis produkt blir utvikla. Materialval handlar ikkje lenger berre om eigenskapar og pris – dei påverkar alt frå klimafotavtrykk og produksjon til merkevare, lønsemd og konkurransekraft. 

For designarar betyr dette nye moglegheiter. For næringslivet betyr det nye strategiske val. 

Kvar går vegen vidare?

Denne ettermiddagen går vi frå eksperimentelle biomateriale til aluminium i industriell skala, og frå redesign av ein lysklassikar til erfaringane frå ein produsent som skal omsetje ambisjonar om lågare utslepp til faktisk produksjon.  

Vi skal sjå på det som fungerer. Men også på det som er vanskeleg. For mellom ein lovande materialidé og eit produkt i marknaden ligg spørsmål om pris, kvalitet, skala, tilgang og risiko. Kven tek dei vala? Kven driv utviklinga? Og kva må designarar og industri lære av kvarandre dersom betre materialløysingar skal bli meir enn gode intensjonar? 

Dette seminaret passar for

• designarar og arkitektar 
• bedriftsleiarar og beslutningstakarar 
• innovasjons- og produktutviklingsmiljø 
• produksjons- og industribedrifter 
• gründerar og oppstartsbedrifter 
• FoU-miljø og forskarar 
• alle som er opptekne av korleis framtidas produkt blir til 

Velkomen til ein ettermiddag – fysisk eller digital – om material, innovasjon og konkurransekraft, og om kvifor framtidas design startar i materialet.